Maromak halo akordu ho Abrão

¹ Bainhira Abrão tinan 99, NAI Maromak mai hatudu Aan ba nia. Nia hatete, “Hau nee Nai Maromak Boot Liu. O tenki tuir nafatin Hau nia hakarak, i moris lo-loos. ² Hau atu halo akordu ho o, i halo o nia jerasaun sai barak teb-tebes.”

³ Abrão mos hakneak ho hakruuk too rai. Nai Maromak koalia tan dehan, ⁴ “Hau halo akordu ho o, nunee: o sei sai nasaun barak nia bei-ala. Tanba nee, o nia naran laos Abrão tan ona (nee dehan katak ‘aman nebee konhesidu’), maibee Abraão (nee dehan katak ‘nasaun barak nia bei-ala’). ⁶ Hau sei halo o nia jerasaun barak teb-tebes. Hau sei harii nasaun barak liu hosi o, ho sei foti liurai barak hosi o nia jerasaun.

⁷ Hau kaer nafatin Hau nia akordu ho o, ho mos o nia jerasaun sira. Akordu nee rohan la iha, tan Hau nee o nia Nai Maromak ho tan o nia jerasaun sira nia Nai Maromak. ⁸ Rai Kanaán nee hotu, Hau sei foo ba o ho o nia jerasaun sira. Agora o hela iha nee hanesan ema lao rai. Maibee aban-bainrua rai Kanaán nee tomak sei sai o nia jerasaun sira nian, too tinan ba tinan. I Hau rasik mak sira nia Maromak. ⁹ Maibee o ho o nia jerasaun sira mos tenki tuir nafatin akordu nee. Mane hotu-hotu tenki sunat. ¹¹ Komesa agora, mane hotu-hotu nebee iha ona loron walu, tenki sunat. O nia familia, ho o nia ema sira hotu, ho o nia atan sira nebee o hola ona hosi nasaun seluk, sira hotu tenki sunat. Sunat nee hanesan sinal akordu entre Hau ho imi. ¹⁴ Mane nebee mak la sunat, la tama iha Hau nia akordu, i la pertense Hau nia povu.”

¹⁵ I Nai Maromak dehan tan, “Komesa agora ba oin, o la bele bolu tan o nia kaben, Sarai, maibee bolu fali Sara.†+ 17:15 Naran Sara nee dehan katak ‘nasaun barak nia bei-ala’.¹⁶ Hau sei foo bensaun barak ba Sara, para bele hetan oan mane ida foo ba o. Tebes! Sara sei sai nasaun barak nia bei-ala. I Hau sei foti liurai barak hosi nia jerasaun.”

¹⁷ Entaun, Abraão hakneak i hakruuk too rai. Maibee iha nia laran nia hamnasa. Nia hanoin dehan, “Mane katuas tinan atus ida hanesan hau nee, sei hetan tan oan? I Sara mos ferik liu ona ho tinan 90, oinsaa sei bele hetan oan?” ¹⁸ Nia mos dehan ba Maromak, “Maromak, biar Ismael deit mak hetan hau nia rikusoin mos, la buat ida.”

¹⁹ Maibee Nai Maromak hataan, “Lae! O nia kaben Sara mak sei hetan oan mane ida. O tau nia naran Isac. Hau nia akordu sei tuun ba nia, ho nia jerasaun too tinan ba tinan. ²⁰ Hau mos rona ona saida mak o husu atu foo ba Ismael. Tanba nee, Hau mos foo bensaun ba Ismael, i Hau sei aumenta nia jerasaun halo barak. Sei iha liurai suku l2 hosi nia jerasaun. I nia jerasaun sei sai nasaun boot ida. ²¹ Bele nunee, maibee Hau nia akordu nee ho deit Isac. Iha tinan oin mai, maizoumenus tempu hanesan nee, Sara sei tuur ahi.” ²² Koalia hotu nunee, Nai Maromak mos baa, husik hela Abraão.

²³ Iha loron nee kedas, Abraão halo tuir Nai Maromak nia orden. Nia mos sunat. Depois nia sunat Ismael, ho mane hotu-hotu iha nia familia, ho mos nia atan mane sira hotu. Iha loron sira sunat nee, Abraão tinan 99 ona, i Ismael tinan 13.