Nai Maromak halo lalehan, rai ho buat hotu-hotu iha nia laran

¹ Hahuu fo-foun Nai Maromak halo lalehan ho rai.

² Iha tempu nebaa, mundu seidauk iha forma i buat ida seidauk iha. Bee deit mak iha. I nakukun taka metin bee nee. Maromak nia Espiritu†+ 1:2 Lian Ebreu iha nee, nia signifikadu bele oi-oin, ‘Maromak nia Espiritu’, ou ‘anin hosi Maromak’, ou ‘poder hosi Maromak’. semo baa-mai iha bee nia leten.

³ I Nai Maromak hatete, “Tenki iha naroman.” Koalia tiha nunee, naroman mos iha. ⁴ Nia laran haksolok, tanba Nia haree naroman nee diak duni. I Nia haketak naroman nee hosi nakukun, para ida-idak ho nia oras rasik. ⁵ Nia foo naran ba naroman nee dehan, ‘loron’, i nakukun nee, ‘kalan’. Nee mak loron ida.

⁶ I Nai Maromak hatete, “Tenki iha fatin mamuk hodi haketak bee. Nee para iha bee iha parte leten, ho bee iha parte kraik.” Koalia tiha nunee, bee nee mos fahe ba rua. ⁸ I Nia foo naran ba fatin mamuk nee ‘loro leten’. Nee mak loron rua.

⁹ I Nai Maromak hatete, “Bee iha parte okos nee, tenki hamutuk iha fatin ida, para bele iha rai maran.” Koalia tiha nunee, rai maran mos iha. ¹⁰ Parte maran nee, Nia bolu ‘rai’, i bee nebee halibur hamutuk nee, Nia tau naran ‘tasi’. Nai Maromak nia laran haksolok, tanba haree buat sira nee hotu diak duni. ¹¹ I Nai Maromak hatete, “Rai tenki foo moris duut ho ai. Tenki iha ai nebee foo fuan, duut nebee foo musan, tuir ida-idak nia modelu.” Koalia tiha nunee, duut oi-oin ho ai oi-oin mos iha. ¹² Iha rai maran, duut ho ai sira foo musan ho fuan tuir ida-idak nia modelu. Nai Maromak nia laran haksolok, tanba haree buat sira nee hotu diak duni. ¹³ Nee mak loron tolu.

¹⁴ I Nai Maromak hatete, “Iha parte leten, tenki iha buat oi-oin para foo naroman ba rai. Tenki iha buat nebee foo naroman ba loron, ho buat nebee foo naroman ba kalan. Nee hanesan sinal hodi sura tempu, loron, ho tinan.” Koalia tiha nunee, buat naroman sira nee hotu mos iha. ¹⁶ Nunee Nai Maromak halo buat naroman boot oin rua. Ida boot liu foo naroman ba loron; ida kiik liu foo naroman ba kalan. I Nia mos halo fitun-fitun. ¹⁷ Nia tau buat sira nee iha lalehan, hodi foo naroman mai rai, ¹⁸ iha tempu loron, i iha tempu kalan. Nunee, buat sira nee haketak naroman hosi nakukun. Nai Maromak nia laran haksolok, tanba haree buat sira nee hotu diak duni. ¹⁹ Nee mak loron haat.

²⁰ I Nai Maromak hatete, “Tenki iha ikan bara-barak ho buat oi-oin tan nebee moris iha bee laran. I tenki iha manu fuik bara-barak semo iha loro leten.” ²¹ I Nia halo ikan oi-oin, animal bo-boot nebee moris iha tasi laran, ho buat oi-oin tan nebee moris iha bee laran. Nia mos halo manu fuik oi-oin. Nai Maromak nia laran haksolok, tanba haree buat sira nee hotu diak duni. ²² I Nai Maromak foo bensaun ba animal sira nee hotu dehan, “Ikan sira tenki aumenta barak para halo nakonu bee iha nebee-nebee. I manu fuik sira mos tenki aumenta barak.” ²³ Nee mak loron lima.

²⁴ I Nai Maromak hatete, “Tenki iha animal oi-oin moris iha rai maran. Hanesan animal hakiak, animal fuik, i animal nebee dolar iha rai, ida-idak hahoris tuir nia modelu.” Koalia tiha nunee, animal sira nee mos iha. Nai Maromak nia laran haksolok, tanba haree buat sira nee hotu, diak duni.

²⁶ I Nai Maromak hatete, “Mai Ita halo ema hanesan Ita nia Aan.†+ 1:26 Matenek nain sira kona ba Biblia dehan, ita ema hanesan Maromak nunee: ita bele hanoin, bele koalia, ho bele foti desizaun. Para sira domina ikan hotu-hotu iha tasi, manu fuik hotu-hotu iha loro leten, animal hakiak hotu, ho animal sira seluk nebee moris iha rai.”†+ 1:26 Kolose 1:16

²⁷ Nunee Nai Maromak halo ema hanesan Nia Aan. Nia halo sira mane ho feto. ²⁸ I Nia foo bensaun ba sira dehan, “Imi tenki iha oan barak ba, hodi halo nakonu mundu, i tau matan ba. Imi mos tenki domina ikan, manu fuik, ho animal hotu nebee moris iha rai. ²⁹ Rona di-diak mai! Hau foo ba imi ai haan oi-oin iha rai nee, hanesan ai nebee foo fuan ho ai nebee foo musan. ³⁰ Hau mos foo ai tahan ho duut oi-oin, ba animal sira nia hahaan. Hahaan ba animal animal fuik sira, animal sira dolar iha rai, ho manu fuik sira.” Koalia tiha nunee, hahaan oi-oin mos iha. ³¹ Nai Maromak haree buat sira hotu nebee nia halo ona nee, i Nia laran haksolok, tanba buat sira nee diak teb-tebes. Nee mak loron neen.