ጳዉሎሲ፥ «ኑሲ ዎሲቴ» ያጌዳ
1 ዉርሴን ኑናዳን ፆሳ ካሊያዋንቶ፥ ጎዳ ቃላይ ሂንቴንቱ ጊዶን፥ ኤሌካ ኣካናዳኒኔ ቦንቼታናዳን፥ ኑሲ ፆሳ ዎሲቴ። 2 ቃሲ ኣሳይ ኡባይ ኣማኔና ዲራው፥ ፆሳይ ኑና ናጋራንቻ ኣሳቱዋፔኔ ኢታ ኣሳቱዋፔ ኣሻና ማላ፥ ኑሲ ዎሲቴ።
3 ሺን ጎዳይ ኣማንያዋ፤ ኢ ሂንቴና ሜንናኔ ቃሲ ኢታፔካ ናጋና። 4 ኑኒ ሂንቴና ኣዛዚያዋ ሂንቴንቱ ሃዒ ኦያዋኔ ቃሲ ሲንፔካ ኦናዋ ጎዳይ ኑና ሂንቴዋን ኣማን።
5 ጎዳይ ሂንቴንቱ ዎዛና ፆሳ ሲቁዋኮኔ ኪሪስቶሲ ኢሚያ ዳንዳያኮ ካሌ።
ኪታ ኪቴቲ ዴዓናዌ ጊዴ
6 ኑናዳን ፆሳ ካሊያዋንቶ፥ ሂንቴንቱ ኑፔ ኣኬዳ ዎጋ ካሌናን ኣዛላ ዴዑዋ ዴዒያ ኢሻ ኡባፔ ሂንቴንቱ ሻኬታናዳን፥ ኑ ጎዳ ዬሱሲ ኪሪስቶሳ ሱንን ሂንቴና ኣዛዜቶ። 7 ኣዪሲ ጎፔ፥ ኑኒ ሂንቴናና ዴዒያ ዎዴ ኣዛሊቤና ዲራው፥ ሂንቴንቱ ኑዋዳን ሃኒዴ ዴዓናው ቤሲያዋ ሂንቴንቱ ሂንቴንቱ ሁጲያን ኤሪታ። 8 ኑኒ ሂንቴፔ ኦሲኔ ቶኩዋ ጊዴና ማላ፥ ቃማኔ ጋላሲ ዳቡሪዴኔ ጃሚዴ ኦዴ ዴዔዳዋፔ ኣቲን፥ ኦፔኔ ቁማ ጮ ሚቦኮ። 9 ኑኒ ሄዋ ኦዳዌ ሂንቴንቱ ኑዋዳን ሃኒዴ ዴዓናዳን፥ ኑኒ ሂንቴንቶ ሌሚሱዋ ጊዳናዳፔ ኣቲን፥ ሄዋ ሂንቴና ኦቻናው ኑሲ ማታይ ዪና ጊዴና። 10 ኣዪሲ ጎፔ፥ ኑኒ ሃራይ ኣቶ ሂንቴናና ዴዒዴካ፥ «ኦናው ኮዬና ኡራይ ኦኒኔ ሞፖ» ያጊዴ ሂንቴና ኣዛዜዶ።
11 ኣዪሲ ጎፔ፥ ኣሳ ዬዉዋን ጌሊያዋፔ ኣቲን፥ ኣዪኔ ኦናዋንቱ፥ ኣዛላ ዴዑዋ ዴዒያ ኣማሬዳ ኣሳቱ ሂንቴንቱ ጊዶን ዴዒያዋ ኑኒ ሲሴዶ። 12 ኑኒ ሄዋንቱ ማላ ኣሳቱ ማራ ዴዑዋ ዴዓናዳኒኔ ኦዴ ቁማ ማናዳን፥ ጎዳ ዬሱሲ ኪሪስቶሳ ሱንን ኣዛዜቶኔ ዞሬቶ።
13 ሺን ሂንቴንቱ ኑናዳን ፆሳ ካሊያዋንቶ፥ ሎዖ ኦሱዋ ኦናው ኣዛሎፒቴ። 14 ቃሲ ኑኒ ሃ ዳቢዳቢያን ኪቴዳ ኪታው ኣዛዜቴና ኡራይ ኦኒኔ ዴዖፔ፥ ሄ ኡራ ኣኬኪቴ። ኢ ዬላታና ማላ፥ ኣፔ ሻኬቲቴ። 15 ሺን ኢሻዳን ኣ ሴሪቴፔ ኣቲን፥ ሞርኪያዳን ፄሎፒቴ።
ዉርሴ ሳሮታ
16 ሳሮቴ ጎዳይ ባሬ ሁጲያን ሂንቴንቶ ኡባ ዎዴኔ ኡባ ባጋና ሳሮቴ ኢሞ። ጎዳይ ሂንቴናና ኡባና ጊዶ።
17 ታኒ ጳዉሎሲ፥ ሃ ሳሮታ ታ ኩሺያን ፃፋዲ፤ ታ ዳቢዳቢያ ኡባው ሃዌ ታ ፊርማ። ሃዌ ታኒ ፃፊያ ኦጊያ።
18 ኑ ጎዳ ዬሱሲ ኪሪስቶሳ ኣ ኬካቴይ ሂንቴናና ኡባና ጊዶ።
ጳዉሎሲ
ፂሞቶሳው
ፃፌዳ ኮይሮ ኪታ
ጌሉዋ
ፂሞቶሳ ጌቴቲያ፥ ኣማኒያ ያላጋይ፥ ቄሪ ኢሲያ ጌቴቲያ ሳዓን ዬሌቴዳ። ኢ ባሬ ዳዪ ባጋና ኣዪሁዴ ኣሳ፤ ባሬ ኣቡ ባጋና ቃሲ ጊሪኬ ኣሳ። ኢ ጳዉሎሳና ኪታን ኢቲፔ ዙፔቲያ ኣሳ፤ ሚሺራቹዋ ቃላ ኪታካ ኣናና ማዴቲዴ ኦያዋ። ጳዉሎሲ ፂሞቶሳው ፃፌዳ ኮይሮ ኪታይ ሄዙ ኣይፌ ዬዋቱዋን ሻኬቴ።
ኡባፔ ካሴቲዴ ሃ ኪታይ ኣማኒያ ኣሳ ጊዶን ዴንዴዳ ዎርዶ ቲሚርቲያባ ሚኒሲዴ ኦዴ። ሃ ኢማ ጊዴዳ ቲሚርቲ ኣዪሁዳ ኣሳቱዋ ቆፋፔ ባጋኔ ሃራ ኣሳቱዋ ቆፋፔ ባጋ ኦይቄዳዋ፤ «ሃዌ ቤቲያ ኣላሚ ናጋራን ሃምባላቼቲ ዲጌዳዋ ጊዲያ ዲራው፥ ኣሳይ ኣቶቴ ዴማናው ዱማ ጊዴዳ ፁራ ኤራቴ ኤራናው፥ ኢቲ ኢቲ ቁማቱዋ ሜናን ኣጋናዉኔ ማቺያ ኣኬናኒኔ ኣሲና ጌሌናን ዴዓናው ኮሼ» ያጊያ ቆፋ ባሶ ኡዲዴ ኦይቄዳዋ። ሄዋ ቦላካ ጉጂዴ ኣ ኪታይ ኣማኒያ ኣሳ ኣዪሱዋባኔ ጎይኑዋ ዎጋባ ታማሪሲያ ቲሚርቲያ፤ ሄዋዳንካ ቃሲ ኣማኒያ ኣሳ ካሌያዋንቱኔ ኡንቱንታ ማዲያዋንቱ ኣይ ማላ ኤሻና ዴዒያዋንታ ጊዳናው ቤሲንቶ ኦዲያባ ኦይቄዳ። ዉርሴን ፂሞቶሲ ዬሱሲ ኪሪስቶሳሲ ኦያ ሎዖ ኦሳንቻ ዋኒዴ ጊዳናው ዳንዳይንቶኔ ቃሲ ዱማ ዱማ ኣማኒያ ኣሳ ማባራ ሲንን ኣው ዴዒያ ኣዎቴሲ፥ ጳዉሎሲ ኣ ዞሬዳ ዞሪያ ቤዔቶ።
ሼምፓቱዋ ኡባቱዋሲ ኢሜቴዳ ቃን ቆፋቱዋ
ጌሉዋ (1፡1-2)
ኣማኒያ ኣሳባኔ ኡንቱንቱ ጊዶን ኦያ ፆሳ ኦሳንቻቱዋባ (1፡3-3፡16)
ፂሞቶሳው ኣ ኦሱዋሲ ኢሜቴዳ ቲሚርቲያ (4፡1-6፡21)